Müasir dövrdə insanın təbiətlə münasibəti sadəcə istehlak üzərində qurulmur. İnsanlıq qədimdən bəri sağ qalmaq və qidalanmaq üçün yönəldiyi fəaliyyətləri bu gün bədən və ruhun tərbiyəsi vasitəsinə çevirir. Bu dəyişikliyin ən bariz nümunələrindən biri də dünyada və ölkəmizdə sürətlə populyarlıq qazanan İdman Balıqçılığıdır. Çoxları üçün balıqçılıq sadəcə həvəskar bir hobbi və ya qida toplamaq vasitəsi kimi görünsə də, əslində bu sahə beynəlxalq qaydaları, Federasiyası və dünya çempionatları olan rəsmi bir idman növüdür. İdman Balıqçılığını ənənəvi ovçuluqdan ayıran ən fundamental fərq onun fəlsəfəsindədir. Burada əsas prinsip ingilis dilində rəsmi olaraq "Catch and Release" adlanan, dilimizə tərcümədə isə "Tut və burax" kimi daxil olan qaydadır.
İdmançı balıqla fiziki və intellektual mübarizə aparır, onun müqavimətini qıraraq sudan çıxarır. Lakin qələbə qazanıldıqdan sonra ov qənimətə çevrilmir. Balığın çəkisi və ölçüləri qeydə alınır, fotoşəkili çəkilir və canlıya heç bir zərər vermədən o, yenidən doğma mühitinə — suya buraxılır.
Məqsəd təbiətin faunasına zərər vermədən qələbə sevincini dadmaqdır.
İdman balıqçılığında şans amili demək olar ki, minimuma enir. Uğurlu bir idmançı eyni zamanda yaxşı bir strateq, meteoroloq və bioloq olmalıdır. Suda uğur qazanmaq üçün aşağıdakı elmi və praktiki biliklər tələb olunur:
- Hidrologiya və Meteorologiya: Suyun temperaturu, oksigen səviyyəsi, barometrik təzyiq və küləyin istiqaməti balıqların suyun hansı qatlarında toplandığını təyin edir. İdmançı bu göstəriciləri analiz etməyi bacarmalıdır.
- Süni və Təbii Yem Sənəti: İdmançılar təbii yemlərdən əlavə voblerlər, silikonlar və digər zərərsiz materiallardan hazırlanmış yemlərlə balığın ovçuluq instinktini oyatmalıdırlar. Süni yemi suyun altında canlı kimi hərəkət etdirmək isə ciddi fiziki məşq və texnika tələb edir.
- Beynəlxalq Standartlar: Beynəlxalq İdman Balıqçılığı Konfederasiyasının (C.I.P.S.) qəbul etdiyi nizamnaməyə əsasən, yarışlarda dopinq nəzarətindən tutmuş, istifadə olunan sapların qalınlığına qədər hər bir detal ciddi şəkildə tənzimlənir.
Ölkəmiz coğrafi mövqeyinə, zəngin çay və göl şəbəkəsinə, həmçinin Xəzər dənizinə görə idman balıqçılığının inkişafı üçün unikal bir məkandır. Ondan başqa idman balıqçılığının inkişafı ölkəmizdə həm də brakonyerliyə (qanunsuz ova) qarşı mübarizədə ən effektiv silahlardan biridir. Çünki su hövzələrində idmançıların və qanuni klubların sayı artdıqca, təbiəti talan edənlərin fəaliyyət dairəsi daralır.
Nəticə olaraq İdman Balıqçılığı sadəcə bir yarış deyil, insanın daxili aləmini sakitləşdirən, səbri öyrədən və ən əsası təbiəti qorumağı təbliğ edən bir mədəniyyətdir. Ölkəmizdə bu idman növünə dövlət və cəmiyyət səviyyəsində dəstəyin artması, həm gənclərimizin sağlam ruhda böyüməsinə, həm də Azərbaycanın ekoloji turizm xəritəsində mühüm bir mərkəzə çevrilməsinə təkan verə bilər.
